KAILASHAHAR BAPTIST CHRISTIAN ASSOCIATION THEPHUNG

Thuhmahruai: Kailashahar Baptist Christian Association (KBCA) hi Isua Krista iphun koihranhei rongbawlna dinga kum 1943 (Exec. Com, KBCA August 28-19, Min.no.18/2003)a insuikhawmna achang. KBCA thephûng insui ding hin Darlong Kristian thephûng insuiloi hi ân thei no. KBCA nih Darlong Kristian thephûng hi poisa puma hlangka omloia intheiloi angka hi achang. A hnuaia chanchin poimaw itarlanghei hi lekha ziak hmasak (first hand information documents) hlui i om sun nih mî hlui la damhei interview aṭanga hmusuak nih hawi suak an chang. Thephung insui ding om khopa an loi inbumna lekhahei ziaka ei idawn chu 1959 aṭangin achang. Kum 1919 aṭanga 1959 hmâka thiam lam lama lekha loi inziahei a om tâk loina san inziaka om chu “Rev.Lalhuala In kâng lei” ti achang (Kailashahar Presbytery Inkhawmpui 15-18 Jan 1959, Darchawi, Min. No.1) ti dân angkan. Maleiachun, lekha chia a om tâk naw hnung homin a manmasi ngêi an la om leiin anmanihei inzawtin thil tamka hawifia thei a la chang. Atun ṭum hin ma chanchin tawite nih Founding Day hmang dân ding program siam dinga association ai awhin ruatin ki om leiin inthûk fêka insui aṭul zia a nên hawi tira, chun ṭhavaika lekhabu angka siam hi a poimaw zia a nêm hawi thartir. A hnuaia hunbi khiaka omhei hi lekha omsunhei study nih ulianhei interview aṭanga siamsuak achang.

A. Association inṭan hma kum 1919-1943:

*1919 Darlong kristian chang kum (Kum 1994 a Darlong Kristian kum 75na ti a Golden Jubilee hmang dân dung zuiin). 

*1919 aṭanga 1937 vêl ari hin mission organisation hrang hrangin Darlong Kristianhei hi loi enkol an chang. Mahei chu ân dot dânin  NEIGM (North East India General Mission), chun IBPM (Indo-Burma Pioneer Mission), chun NZBMS (New Zealand Baptist Missionary Society).

*1938 hi chun NZBMS hmangin TBCU a loi hong inṭan ve tâk leiin TBCU hnuai achun loi omin NZBMS heiin thoktuhei hlaw loi pêin ei koihran hi enkol a loi chang. TBCU ân ṭan aṭangin ei koihran rongbawlna thu hi inkop thlapka loi kal hrim aloi chang.

*1938 aṭanga 1943 vêla ri hi chu NZBMS vong na hnuaia an dân angkan koihran enkol a aloi chang. Inkhawmpui achangnawlemo bial thu achangnawlemo rongbawlna ikapai thua missionary hongtir organisation chu a chawmpu ichangin ei bial sûnga koihranhei nânsa fêka enkol nih chawm aloi chang.

B. Rihming thu:

• 1943 - 1968 ari in “Kailashahar Presbytery” ti a koi aloi chang.
• January 18-22, 1968 Nalkata Inkhawmpui homa Presbytery ti a koi ala chang.
• June 30, 1968 Darchawi a Executive Committee inbum aṭangin “Kailashahar Association” ti a koi achang.
• January 24-26, 1969 Darchawi Inkhawmpui a “Kailashahar Baptist Christian Association” ti a koi ṭan achang. Vawn ari hom hin Lalpan ma rihming inpuin hnam tamka inchinin chanchin ṭha hrilna rong ei bawl.

                         (A chunga kum rephei khi lekha hlui ena inziak suak an chang)

C. Koihran enkolna thu nih rongbawlna: Kailashahar Baptist Christian Association hi a ṭan aṭang reng hin koihran humhal nih puitlingna thu thlîrin inenkolna dinga zia-dân loi ruahman a loi chang. Ti tâk angkan ma zia-dân chu a kâng leiin January 15-18,1959 Presbytery Inkhawmpui Min.No.1 in zia-dân a siam ṭhat nawk. A tuna Guidelines ei inei ahin tamka chu ma dungzuia siam achang.

a. Bial an loi ṭhen dân: Simbial, Hmarbial nih Manu bial(Roirelna Min.No.3/1959) dung zuiin.

b. 1959 Inkhawmpuia Treasurer report pompuina Min.No.22/1959 angkan kuta poisa om Rs.83.44 aloi chang.

c. Sum suak ding dân Budget siam Executive Committee dt.25.06.1959 enin, * members lu dina seki in Rs.175/- * ṭhalai a ṭangin Rs.100/- *nuhoi a ṭangin Rs.100/- * thilpêk dang(donation) Rs.125/- a rengkan Rs. 500/-. Ma hong suak ding a ṭang chun Lalpa ram inzatna tiang thlirin thoktu hlaw dinga sêng dinga ri-ruat aloi chang. Ma laia thoktu ei ihawi thiam hei chu Pastor nih mission zirtirtu ti hi aloi chang.

D. Association angka changkâng dân:

• 1943 a ṭangin 1983 ari hi mâni a lân enkol thiamloi eiloi chang.
• 1984 a ṭang in full-fledged association angkan a ngir ṭan. Ma kum a ṭang han “mâni a inchawm in” “mani a inrêlbawl in” nih “mani a thuhril” ti in thu kulmûk inthumka inei in a ngir ṭan.
• Hawi dânin 1984 a mani hlîra thil thaw ṭan ei tum laia office nei ṭan a sum nih puan a loi inei chu Rs. 5/- aloi chang.
• April 26, 1985 in FCRA registration nei ṭan achang.
• 1995 in Society Registration Act of 1860 hnuaia in register achang.
• Ma lekha insua ni a ria hawi dânin KBCA ram neina hmun chu; Darchawi, Nalkata, Deora, Chailengta, Zamtoli, Lalcherra, Morachera, Khasrang, Araidrun nih Saidacherra 4 a. A rêngkan  12’25 kani vêl a chang.